ការផលិតម៉ាសដ៏ច្រើននេះ គឺជាការឆ្លើយតបទៅនឹងការអំពាវនាវរបស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានចាត់ឲ្យក្រសួងសុខាភិបាល បញ្ជាទិញម៉ាសពីក្រៅប្រទេសចំនួន៤លានម៉ាស និងបញ្ជាទិញពីរោងចក្រផ្ទាល់នៅខេត្តព្រះសីហនុចំនួន១លាន២សែនម៉ាស ដើម្បីបន្ថែមលើអ្វីដែលក្រសួងសុខាភិបាលបានស្តុកទុក ខណៈសម្ភារៈពេទ្យសម្រាប់ការពារពីការឆ្លងនូវវីរុសកូវីដ-១៩ ដូចជា ម៉ាស អាវការពារ ជាដើម ត្រូវបានបញ្ចេញប្រើប្រាស់ជារៀងរាល់ថ្ងៃ។
ការបញ្ជាទិញម៉ាសរបស់ប្រមុខរដ្ឋាភិបាលនេះ គឺដើម្បីធានាថា កម្ពុជា មានសម្ភារៈគ្រប់គ្រាន់សម្រាប់ក្រុមគ្រូពេទ្យប្រើប្រាស់ក្នុងការប្រយុទ្ធនឹងវីរុសកូវីដ-១៩ ដោយត្រូវតែរក្សាសុវត្ថិភាពជូនក្រុមគ្រូពេទ្យទាំងអស់ បន្ទាប់ពីមានបទពិសោធន៍ខ្វះម៉ាស និងសម្ភារៈពេទ្យពីបណ្តាប្រទេសមួយចំនួនរួចមកហើយ។
ប្រជាពលរដ្ឋមួយចំនួន បានសំដែងនូវការសាទរចំពោះដំណឹងការផលិតម៉ាសដ៏ច្រើននេះនៅក្នុងស្រុកព្រោះថា ចាប់តាំងពីមានការឆ្លងជំងឺកូវីដ-១៩ នៅលើពិភពលោកម៉ាសដែលធ្លាប់តែលក់ក្នុងតម្លៃដ៏ទាប ក៏ស្រាប់តែហក់ឡើងមួយគុណជា៤ ឬ៥ដង។ ប៉ុន្តែបន្ទាប់ពីប្រមុខរាជរដ្ឋាភិបាលបានអំពាវនាវឲ្យអ្នកលក់ម៉ាសកុំមានការដំឡើងថ្លៃរួចមក គេសង្កេតឃើញថា ម៉ាសនៅកម្ពុជាមានការចុះថ្លៃបន្តិចមកវិញ តែមិនចុះដល់តម្លៃដែលមិនទាន់មានការរាតត្បាតជំងឺកូវីដ-១៩ នោះទេ។
ក្រុមប្រជាពលរដ្ឋខាងលើ សង្ឃឹមថា តម្លៃម៉ាសនៅកម្ពុជា នឹងមិនឡើងថ្លៃទៀតនោះទេ ដោយសារមានការផលិតនៅក្នុងស្រុកច្រើន ដែលអាចផ្គត់ផ្គង់ដល់អ្នកប្រើប្រាស់ក្នុងស្រុកបានគ្រប់គ្រាន់។
