បរទេស ៖ ជំងឺ Covid-19 បានកំពុងឆ្លងរីករាលដាល់ក្នុងប្រទេសថៃ បណ្តាលឲ្យមានអ្នកឆ្លងវីរុសដ៏កាចសាហាវនេះ មិនតិចករណីទេ ។ ចំពោះអ្នកឆ្លងជំងឺនេះ ក្រុមគ្រូពេទ្យយកទៅព្យាបាល ត្រូវឲ្យឃ្លាតឆ្ងាយពីគ្រួសារមួយរយៈមិនថាក្មេង ឬចាស់ឡើយ។
ជាក់ស្តែង កាលពីថ្ងៃទី១៦ ខែមេសា ឆ្នាំ ២០២០ មានអ្នកប្រើហ្វេសប៊ុកឈ្មោះ Ochin Ad-din បានបង្ហោះរូបភាពក្មេងស្រីម្នាក់ រស់នៅយ៉ាឡា ភាគខាងត្បូងប្រទេសថៃបានឆ្លងជំងឺ Covid-19 ហើយក្រុមគ្រូពេទ្យ បានយករថយន្តសង្គ្រោះបន្ទាន់ជាមួយបុគ្គលិកពេទ្យម្នាក់ដែលស្លៀកឈុតការពារ មកដឹកក្មេងស្រីតូចនេះ យកទៅព្យាបាល ប៉ុន្តែដែលធ្វើឲ្យមហាជនកមានក្តីសង្វេគនោះ ពេលក្មេងស្រីតូចរូបនោះឡើងរថយន្ត ម្តាយនិងក្រុមគ្រួសារមិនអាចទៅជាមួយមើលថែនាងបានឡើយ ពោលគឺក្មេងស្រីតូចនោះ បានត្រឹមតែស្ពាយបង្វេចខោអាវដែលអាចយកទៅតាមខ្លួនបាន។

ចំណែកឪពុកម្តាយ និងគ្រួសារ បានឈរនាងដើរឡើងរថយន្តទាំងអារម្មណ៍សោកសៅជាបំផុត តែយ៉ាងណាម្ចាស់គណនីហ្វេសប៊ុកខាងលើ មិនបានបញ្ជាក់ថា ក្រុមគ្រូពេទ្យនាំក្មេងស្រីរូបនេះ ទៅសម្រាកព្យាបាលនៅមន្ទីរពេទ្យណា ហើយអាការជំងឺរបស់នាងមានសភាពបែបណាទេ៕